1Pe 3 | PltULB | STEP | Amin’izany fomba izany, Ianareo vehivavy dia tokony hanaiky ny vadinareo. Ataovy izany na dia misy lehilahy maro aza tsy mankatoa ny teny, ary mety ho azo izy ireo na tsy misy aza ny teny, amin’ny alalan’ny fitondran-tenan’ny vadin’izy ireo.

1 Peter 3

1 Amin’izany fomba izany, Ianareo vehivavy dia tokony hanaiky ny vadinareo. Ataovy izany na dia misy lehilahy maro aza tsy mankatoa ny teny, ary mety ho azo izy ireo na tsy misy aza ny teny, amin’ny alalan’ny fitondran-tenan’ny vadin’izy ireo. 2 Fa izy ireo dia hahita ny fitondran-tena mendrikareo am-panajana.

3 Aoka izany ho tanteraka tsy miaraka amin’ireo haingo ivelany: randram-bolo, firavaka volamena, na akanjo lamaody. 4 Fa kosa, aoka izany ho tanteraka miaraka amin’izay ao am-pon’ny olona, sy ny hatsarana maharitran’ny fanahy tsara sy mangina, izay sarobidy eo anatrehan’Andriamanitra.

5 Fa ireo vehivavy masina taloha no nandravaka ny tenan’izy ireo toy izany. Nanana fahatokiana an’Andriamanitra izy ireo ary nanaiky ny vadiny avy. 6 Toy izany fomba izany no nankatoavan’i Abrahama an’i Saraha sy niantsoany azy ho tompony. Ianareo dia zanany ankehitriny raha manao izay tsara sy tsy matahotra olana ianareo.

7 Toy izany ihany, ianareo lehilahy dia tokony miaina miaraka amin’ny vadinareo araky ny fahazavan-tsaina, toy ny fanaka malemy kokoa, ny vehivavy. Tokony omenareo voninahitra izy ireo tahaka ny mpiara-mandova ny fanomezan’ny fiainana. Ataovy izany mba tsy ho voasakana ny vavakareo.

8 Farany, ianareo rehetra, aoka hiray saina, hangoraka, hifankatia tahaka ny mpirahalahy, ho tso-po, ary hanetri-tena. 9 Aza mamaly ratsy ny ratsy na manevateva ny mpanevateva. Mifanohitra amin’izay aza, mitahia hatrany, fa noho izany no niantsoana anareo, mba hahafahanareo mandova ny fitahiana.

10 “Ilay iray izay te hankafy ny fiainana sy te hahita andro tsara dia tokony hanatsahatra ny lelany amin’ny ratsy sy ny molony amin’ny fitenenana fitaka. 11 Aoka izy hiala amin’ny atao hoe ratsy ary hanao izay tsara. Aoka izy hitady fiadanana sy hitaky izany. 12 Ny mason’ny Tompo mahita ny marina, ary ny sofiny mandre ireo fangatahan’izy ireo. Fa ny tavan’ny Tompo dia manohitra ireo izay manao ratsy.”

13 Iza ilay iray izay hamely anareo raha maniry ny hanao ny tsara ianareo? 14 Nefa raha mijaly nohon’ny fahamarinana ianareo, dia sambatra. Aza matahotra izay hatahoran’izy ireo. Aza mangorohoro.

15 Fa kosa, atokano toy ny masina ao am-ponareo ilay Tompo Kristy. Mivonona hatrany hamaly ny olona rehetra izay manontany anareo ny antony hatokinareo an’Andriamanitra. Ataovy amin’ny halemem-panahy sy fanajana izany. 16 Manàna feon’ny fieritreretana madio mba ny olona izay manevateva ny fiainana tsaranareo ao amin’i Kristy dia mety menatra satria miteny manohitra anareo izy ireo toy ny hoe mpanao ratsy ianareo. 17 Tsara kokoa, raha Andriamanitra no maniry, fa mijaly ianareo amin’ny fanaovana ny tsara nohon’ny fanaovana ny ratsy.

18 Efa nijaly nohon’ny fahotana ihany koa i Kristy. Izy izay marina dia nijaly ho antsika, izay tsy marina, mba hitondrany antsika eo amin’Andriamanitra. Novonoina tamin’ny nofo Izy, fa novelomin’ny Fanahy. 19 Tamin’ny alalan’ny Fanahy, dia nandeha izy ary nitory ho an’ireo fanahy izay any am-ponja ankehitriny. 20 Tsy nankatoa izy ireo rehefa niandry ny faharetan’Andriamanitra tamin’ny andron’i Noa, tamin’ny andronn’ny fananganana sambofiara, ary Andriamanitra namonjy olona vitsy _ fanahy valo _ tamin’ny rano.

21 Izany no famantarana ny batisa izay mamonjy anareo ankehitriny_tsy toy ny fanadiovana ny loto amin’ny vatana, fa toy ny antson’ny feon’ny fieritreretana ho amin‘Andriamanitra_tamin’ny alalan’ny fitsangan’i Jesosy Kristy tamin’ny maty. Kristy dia eo an-tanana ankavanan’Andriamanitra. Niakatra any an-danitra izy. Ireo anjely, ireo manam-pahefana, ary ny hery dia tsy maintsy manaiky Azy.